Misioni i OSBE-së ndihmon Policinë e Kosovës në promovimin e konceptit të sigurisë në komunitet përmes një fushate në rrugë

Misioni i OSBE-së ka mbështetur Policinë e Kosovës (PK) dhe Komitetet Lokale për Siguri Publike (KLSP-të) në organizimin e fushatës së Javës së Sigurisë në Komunitet në mbarë Kosovën.

Në tendat e vendosura në sheshet kryesore të tetë qyteteve, përfaqësuesit e PK-së dhe KLSP-ve mbajtën diskutime në panele dhe kuize për të rinjtë lidhur me rolet dhe përgjegjësitë e tyre, rëndësinë e bashkëpunimit mes publikut dhe policisë, si dhe angazhimin e banorëve në iniciativat për sigurinë e komunitetit.

Gjithashtu biseduan me vizitorët rreth këtyre temave, duke përfshirë nxënës të shkollave fillore dhe të mesme dhe kalimtarë, si dhe shpërndanë materiale vetëdijesimi mbi sigurinë në trafik, dhunën në familje dhe tema që kanë të bëjnë me të rinjtë.