Misioni i OSBE-së ndihmon zyrtarët komunalë të zhvillojnë bazën e të dhënave për të kthyerit dhe të ri-atdhesuarit

Një seri trajnimesh tri-ditore për mbledhjen sistematike  të të dhënave dhe zhvillim të bazës së dhënave për të kthyerit dhe personat e ri-atdhesuar për 19 zyrtarë komunalë për  komunitete dhe kthim nga rajoni i Gjilanit ka përfunduar më 12 tetor 2012.

Punëtoritë tri-ditore ishin organizuar nga Misioni i OSBE-së në Kosovë për të ndihmuar komunat që të pranojnë dhe organizojnë informatat e sigurta dhe të azhurnuara për numrin e personave të kthyer dhe të riatdhesuar, karakteristikat demografike dhe asistencën që kanë pranuar.

“Këto punëtori janë pjesë e përpjekjeve të Misionit për t’u ndihmuar institucioneve të Kosovës që merren me problemin e të dhënave të pasigurta dhe jokonsistente në nivelin lokal dhe ndikimin negativ që ka kjo në dhënien efikase dhe me kohë të asistencës për personat e kthyer dhe të ri-atdhesuar”, tha Gulcan Yeroz, ushtruese e detyrës së Seksionit për Komunitete në Misionin e OSBE-së në Kosovë.

“Bazat e të dhënave që ofrojnë informacion të sigurt dhe të azhurnuar do t’u ndihmojnë komunave që të planifikojnë më mirë buxhetin dhe të zbatojnë projekte dhe ndihmojnë personat e ri-atdhesuar,” shtoi Yeroz.

Zyrtarët komunalë për kthime dhe komunitete që janë trajnuar gjatë punëtorisë punojnë në mënyurë të drejtpërdrejtë me përfaqësuesit e komuniteteve, të kthyerit dhe të ri-atdhesuarit. Ata janë përgjegjës për t’u garantuar këtyre njerëzve qasje në të drejtat dhe shërbimet esenciale në nivelin lokal, përfshirë të drejtat pronësore, shëndetësinë, arsimin dhe punësimin.

Misioni i OSBE-së do të monitorojë rregullisht përdorimin e bazës së të dhënave për të vlerësuar efektivitetin e tyre.

Misioni i OSBE-së në Kosovë është i mandatuar me mbrojtjen dhe promovimin e të drejtave të njeriut, demokratizimin dhe zhvillimin e sektorit të sigurisë.