Gratë e shquara nga Beogradi dhe Prishtina mbajnë takimin e katërt me radhë

Katërmbëdhjetë gra të shquara që përfaqësojnë parlamentet, akademinë, shoqërinë civile dhe mediat në Beograd dhe në Prishtinë u mblodhën për herë të parë në Beograd më 15 e 16 dhjetor 2014, si pjesë e procesit të njohur si "Procesi i Budvës" që ka për qëllim angazhimin e këtyre grave në dialog të drejtpërdrejtë.

Pjesëmarrëset diskutuan për rolin e gruas në politikë dhe çështjen e fuqizimit ekonomik. Ato gjithashtu nxorën një numër rekomandimesh që do të përfshihen në një plan veprimi për aktivitete të përbashkëta.

Ky ishte takimi i katërt me radhë i lehtësuar nga Misioni i OSBE-së në Serbi dhe Misioni i OSBE-së në Kosovë që nga viti 2012.

“Me Procesin e Budvës ne duam ta tregojmë rëndësinë e dialogut dhe bashkëpunimit,” tha Suzana Novobrdali, ish deputete e Kuvendit të Kosovës. “Secili mund të kontribuojë në këtë proces, por pa femra një proces i tillë nuk do të jetë i plotë.”

Marija Obradovic, përfaqësuese e rrjetit parlamentar të grave në Parlamentin Serb, tha: “Me anë të dialogut të ndërsjellë dhe bashkëpunimit duam të tregojmë pse është e rëndësishme që gratë t’i bashkojnë forcat, se si kjo mund të na ndryshojë për të mirë neve dhe botën ku jetojmë.”