Pjesëmarrja publike

Misioni punon për të siguruar pjesëmarrje të plotë, të barabartë dhe kuptimplotë të publikut të gjerë në proceset e hartimit të politikave dhe vendimmarrjes. Puna e tij përqendrohet në tri palë kryesore shoqërore - të rinjtë, gratë dhe organizatat e shoqërisë civile – si dhe ndërveprimin midis tyre. Kjo qasje gjithëpërfshirëse siguron përfshirjen e komuniteteve të ndryshme, personave me aftësi të kufizuara dhe individëve nga zona të largëta dhe të vështira për t'u arritur, duke i transformuar ata në palë aktive interesi që shërbejnë si shembuj pozitivë dhe nxitës të ndryshimeve shoqërore.

Akademia e Dialogut e OSBE-së për Gratë e Reja

Akademia e Dialogut e OSBE-së për Gratë e Reja është aktivitet kyç i Misionit në këtë fushë pune. Në bashkëpunim me Misionin në Serbi, angazhon gra të reja nga Prishtina dhe Beogradi për tema si dialogu, ndërtimi i paqes, zgjidhja e konflikteve, barazia gjinore dhe fuqizimi i grave. Kjo kontribuon në avancimin e agjendave të Paqes dhe Sigurisë për Gratë dhe të Rinjtë. Akademia nxit lidhje personale dhe mirëmban dialogun midis pjesëmarrëseve, duke promovuar njëkohësisht marrëdhënie më të mira mes komuniteteve. Misioni përforcon kapacitetet e rrjetit të Akademisë, i cili përfshin 230 anëtare, përfshirë edhe përmes një projekti jashtëbuxhetor të OSBE-së.

Nisma EmPOWER

Misioni mbështet pjesëmarrjen e grave në nivel lokal përmes nismës EmPOWER, e cila konsolidon kapacitetet e politikaneve lokale dhe lehtëson mundësitë e mentorimit midis tyre dhe deputeteve me përvojë të Kuvendit të Kosovës. Duke punuar me Grupet Joformale të Grave, Misioni avancon punën dhe ndikimin e këtyre mekanizmave pjesëmarrës vendorë, duke i mundësuar që të kenë ndikim më të madh në komunitetet e tyre dhe më gjerë.

Angazhimi me shoqërinë civile

Misioni po ashtu promovon qëndrueshmërinë e organizatave të shoqërisë civile dhe angazhimin e tyre aktiv në jetën publike duke rritur kapacitetet e tyre dhe duke ofruar mentorime të përshtatura enkas për të trajtuar nevojat e tyre të veçanta. Misioni krijon hapësira, si p.sh. Forumi vjetor i Shoqërisë Civile, për organizata të ndryshme të shoqërisë civile për të bashkërenduar dhe diskutuar çështje kyçe shoqërore, përfshirë rolin e organizatave të shoqërisë civile për fuqizimin e të rinjve për t'u bërë faktorë të ndryshimit ose kontributet e tyre për të ndërtuar një shoqëri të qëndrueshme dhe gjithëpërfshirëse.

Korniza ligjore dhe strategjike për të rinjtë

Misioni ka kontribuar në reformën e kornizës për të rinjtë në Kosovë, duke ofruar kontribute e ekspertizë kyçe për hartimin e legjislacionit të ri për të rinjtë, duke përfshirë Ligjin për të Rinjtë dhe aktet nënligjore përkatëse. Duke u ndërtuar mbi këto arritje, Misioni vazhdon të mbështesë zhvillimin dhe funksionalizimin e infrastrukturës rinore të Kosovës në nivel qendror dhe lokal, ndërkohë që mbështet aktivistët e të rinjve dhe organizatat rinore.